Dünya - UMMANPRESS

ABŞ İrana qarşı hərbi əməliyyatlara 55 milyard dollardan çox vəsait xərcləyib

umman55 — Mon, 20 Apr 2026 13:09:33 +0200

ABŞ-ın İrana qarşı həyata keçirdiyi hərbi əməliyyatların dəyəri 55,9 milyard dollar təşkil edir.

Bu barədə İran Müharibəsi Xərcləri İzləyicisi portalı məlumat yayıb.

Bildirilib ki, əməliyyatın başlanmasından 50 gün ötür və bu müddət ərzində xərclər qeyd olunan məbləğə çatıb. Portal məlumatları real vaxt rejimində yeniləyir və şəxsi heyətin saxlanılması, bölgəyə göndərilən gəmilər və digər əlaqəli xərclər daxil olmaqla ümumi maliyyə yükünü hesablayır.

Qeyd olunur ki, hesablama metodologiyası Pentaqonun Konqresə təqdim etdiyi hesabatlara əsaslanır. Həmin sənədlərə görə, əməliyyatın ilk altı günündə 11,3 milyard dollar xərclənib, sonrakı mərhələdə isə gündəlik xərclərin təxminən bir milyard dollara çatacağı proqnozlaşdırılıb.

Türkiyədə “ağıllı” şpris ixtira edilib

umman55 — Fri, 17 Apr 2026 21:21:16 +0200

İstanbulun Yıldız Texniki Universitetinin alimləri cərrahi müdaxilələr zamanı riskləri azaldan “ağıllı” şpris hazırlayıblar. Qurğu toxumaların şişirdilməsi və boşaldılması prosesini avtomatlaşdırır və əməliyyat praktikasının ən həssas mərhələlərindən birini asanlaşdırır. İxtira mexatronika kafedrasının müəllimləri Cüneyt Yılmaz və Vasfi Emre Ömürlü tərəfindən təqdim olunub və artıq Türkiyənin Patent və Əmtəə Nişanları İdarəsində faydalı model kimi qeydiyyata alınıb.

Bu barədə “Haber7” portalı məlumat yayıb.

Adi praktikada bu cür manipulyasiyalar əl ilə həyata keçirilir və çox vaxt cərrahın hərəkətlərinin dəqiqliyindən asılı olur. Yeni sistem təzyiq sensoru və kamera ilə təchiz olunub ki, bu da həkimə toxumaların vəziyyətini real vaxt rejimində izləməyə və müdaxiləni ekrandan idarə etməyə imkan verir.

“Qurğumuz standart alətlərdən onunla fərqlənir ki, endoskopik kamera və təzyiq sensoru ilə təchiz edilmiş idarəetmə blokuna malikdir”, – deyə Cüneyt Yılmaz bildirib. Onun sözlərinə görə, bu, məsələn, səs telləri üzərində aparılan əməliyyatlarda prosedurların daha dəqiq və təhlükəsiz icrasına şərait yaradır.

İxtira cərrahiyyənin kritik mərhələlərindən birini tam əl rejimindən obyektiv məlumatlara əsaslanan formata keçirir. Təzyiqə nəzarət və vizuallaşdırma, xüsusilə həssas strukturlarla işləyərkən toxumaların zədələnməsi riskini azaldır.

Vasfi Emre Ömürlünün sözlərinə görə, tibbin yüksək inkişaf səviyyəsinə baxmayaraq, bir çox proseslər hələ də insan amilindən asılıdır. “Səhiyyədə həm pasiyentlərə yardım sistemlərini, həm də həkimlərin gündəlik alətlərini təkmilləşdirmək üçün müxtəlif sahələri birləşdirən layihələrin və texnologiyaların inkişafı daha da gücləndirilməlidir”, – deyə o qeyd edib.

Belə qurğuların gələcəkdə cərrahi əməliyyatların təhlükəsizliyini artıracağı və ağırlaşmaların başvermə ehtimalını azaldacağı gözlənilir.

Çindən İrana mesaj: Hörmüz boğazından sərbəst və təhlükəsiz keçid təmin edilməlidir

umman55 — Thu, 16 Apr 2026 09:49:27 +0200

Çin Xarici İşlər Nazirliyinin açıqlamasına görə, xarici işlər naziri Van İ dünən gecə iranlı həmkarı Abbas Əraqçi ilə telefonla danışıb.

Telefon danışığı əsnasında Çinin naziri Hörmüz boğazının sahil dövləti kimi İranın suverenliyinə, təhlükəsizliyinə, qanuni hüquqlarına və maraqlarına hörmət edilməli olduğunu bildirib. O, həmçinin beynəlxalq ictimaiyyətin ortaq çağırışına uyğun olaraq Hörmüz boğazında naviqasiya azadlığının və təhlükəsizliyin təmin edilməsinin vacibliyini vurğulayıb.

Van İ Çinin regiondakı vəziyyəti və regional ölkələr arasında münasibətləri yaxşılaşdırmaq üçün çalışmağa davam edəcəyini, Yaxın Şərqdə davamlı sülhün və sabitliyin təmin edilməsində konstruktiv rol oynayacağını vurğulayıb.

İranlı nazir isə bildirib ki, Tehran Çinin müharibənin sona çatmasında və sülhün təşviqində konstruktiv rolunu təqdir edir, münaqişənin danışıqlar vasitəsilə rasional həlli yollarını axtarmağa davam edəcək.

Gürcüstanın daha bir bölgəsində quduzluq səbəbindən karantin elan olunub

umman55 — Tue, 14 Apr 2026 17:33:17 +0200

Gürcüstanın şimal-qərbində, Sameqrelo-Yuxarı Svaneti bölgəsinin Martvili bələdiyyəsinin ərazisində quduzluq faktı qeydə alınıb.

Bu barədə Gürcüstanın Milli Qida Agentliyi məlumat yayıb. Agentliyin açıqlamasında deyilir ki, şübhəli statusla təcrid olunmuş və müşahidə altında olan Kutaisi sığınacağına aparılan küçə itində quduzluq aşkarlanıb və buna görə də karantin elan edilib.

“Aprelin 14-də Kutaisi sığınacağına aparılan və şübhəli statusla təcrid olunmuş küçə itində quduzluq aşkarlanıb. Milli Qida Agentliyi hadisə ilə bağlı bütün müvafiq qurumları məlumatlandırıb, quduzluğun aradan qaldırılması tədbirlərinə başlanılıb. Epidemiyanın yayıldığı ərazidə karantin elan edilib”, - deyə Agentliyin bəyanatında deyilir.

Qeyd edək ki, bundan əvvəl Gürcüstanın iki bölgəsində quduzluq səbəbindən karantin elan olunub.

“Atəşkəs” sona çatdı: Rusiya Ukraynaya dron zərbələri endirib

umman55 — Mon, 13 Apr 2026 12:13:50 +0200

Aprelin 13-ü gecəsi Rusiya Ukraynaya altı istiqamətdən 98 hücum dronu ilə zərbələr endirib. Hava Hücumundan Müdafiə Qüvvələri düşmənin dronlarının əksəriyyətini vurmağı bacarıb.

Bu barədə Ukrayna Hərbi Hava Qüvvələrinin “Telegram” kanalına istinadla xəbər verilir.

Hərbi məlumatlara görə, 13 aprel gecəsi Rusiya digər dron növləri ilə yanaşı, 98 ədəd “Şahed”, “Gerbera” və “Italmas” hücum dronunu aşağıdakı istiqamətlərdən buraxıb: Oryol, Bryansk, Kursk, Millerovo, Primorsko-Axtarsk (Rusiya Federasiyası) və Qvardeyskoye (Krım Muxtar Respublikası).

Atılan dronların təxminən 65-i “Şahed” tipli olub.

Doqquz ədəd hücum dronunun hədəfə dəydiyi qeydə alınıb, həmçinin vurulan dronların qalıqları bir məkana düşüb.

“Hücum davam edir və hava məkanında düşmən dronları var. Təhlükəsizlik qaydalarına riayət edin!”, -deyə Hərbi Hava Qüvvələri əhaliyə xəbərdarlıq edib.

Birgünlük tətil “Lufthansa”nın fəaliyyətini iflic edib

umman55 — Fri, 10 Apr 2026 13:11:35 +0200

“Lufthansa”nın kabin heyətinin birgünlük tətili aviaşirkətin fəaliyyətini iflic edib.

Kabin heyəti işçilərinin həmkarlar işçiləri təşkilatı (UFO) “Lufthansa”nın əsas şirkətində və regional törəmə şirkəti olan “Lufthansa CityLine”nin 20 minədək təyyarə bələdçisini aksiyaya qoşulmağa çağırıb. İşçilərin böyük əksəriyyəti tətilə dəstək verib. Bu, pilotların ikimərhələli tətilindən sonra Almaniyanın ən böyük aviaşirkətində bu il baş verən üçüncü böyük tətil sayılır.

Saat 22:00-dək davam edəcək aksiyanın əsasən Münxen və Frankfurt hava limanları olmaqla, Leyptsiq, Berlin, Ştutqart və digər hava limanlarında yüzlərlə aviareysə təsir edəcəyi gözlənilir. “Lufthansa” əks tədbirlər görəcəyini açıqlasa da, əvvəlcədən artıq yüzlərlə reysi ləğv edib. Frankfurt hava limanında planlaşdırılan 350 uçuşdan 75 faizi ləğv olunub.

Tətilin keçirilməsi həmkarlar ittifaqı təşkilatı ilə şirkət rəhbərliyi arasında danışıqların uğursuzluqla nəticələnməsindən sonra qərara alınıb. Danışıqlarda təxminən 19 min təyyarə bələdçisinin əmək şəraitinin yaxşılaşdırılması tələb olunur. İşçilər, xüsusilə iş qrafikinin optimallaşdırılmasını və işdən çıxarılma müddətlərinin uzadılmasını tələb edirlər.

Səudiyyə Ərəbistanında gün ərzində 22 PUA və 11 ballistik raket zərərsizləşdirilib

umman55 — Tue, 07 Apr 2026 20:43:43 +0200

Səudiyyə Ərəbistanı Krallığının hava hücumundan müdafiə sistemləri gün ərzində 22 pilotsuz uçuş aparatını (PUA) və 11 ballistik raketi məhv edib.

Bunu ölkənin Müdafiə Nazirliyinin sözçüsü general Türki əl-Maliki deyib.

Bildirilib ki, ballistik raketlərin dördü Şarqiyyə regionunda zərərsizləşdirilib. Zərərsizləşdirilmiş digər raketlərin mərmiləri isə enerji qurğularına dəyib. Hazırda dəymiş zərər qiymətləndirilir.

İran ordusu İordaniya, Küveyt və Bəhreynə zərbələr endirib

umman55 — Fri, 03 Apr 2026 15:21:02 +0200

İran ordusu pilotsuz uçuş aparatları ilə İordaniya və Küveytdə ABŞ hərbçilərinin dislokasiya məntəqələrinə, həmçinin Bəhreyndə iri alüminium zavoduna zərbələr endirib.

Bu barədə İran ordusu məlumat yayıb.

Məlumata görə, İran ordusu bu gün PUA-larla İordaniyada ABŞ ordusunun avadanlıq, təminat anbarına, Küveytdə ABŞ-ın zirehli briqadasının mexanikləşdirilmiş batalyonunun yerləşdiyi “Camp Afifjan” bazasına və Bəhreyndə ABŞ-ın hərbi sənayesinin təchizatçısı olan ən böyük alüminium zavoduna zərbələr endirib.

Tatarıstanda zavodda baş verən faciədən sonra matəm elan edilib

umman55 — Wed, 01 Apr 2026 10:28:27 +0200

Rusiyanın Tatarıstan Respublikasındakı Nijnekamsk bələdiyyə rayonunda neft-kimya kompleksində baş verən fövqəladə hadisədən sonra üç günlük matəm elan edilib.

Bu barədə rayonun rəhbəri Ratmir Belyayev bildirib. Fövqəladə hal martın 31-də Nijnekamskdakı “Nijnekamskneftexim” zavodunda qaz qarışığının alovlanması nəticəsində baş verib. Bu alovlanma partlayışa və sonradan yanğına səbəb olub.

Müstəntiqlərin məlumatına görə, hadisə nəticəsində üç nəfər ölüb, 72 işçi yaralanıb.

Xəsarət alan on nəfər Rusiya Fövqəladə Hallar Nazirliyinin xüsusi reysi ilə ixtisaslaşmış tibbi yardım göstərilməsi üçün Moskvaya aparılır.

Hadisə ilə bağlı təhlükəli sənaye obyektlərində sənaye təhlükəsizliyi tələblərinin pozulması maddəsi ilə cinayət işi açılıb.

İsfahan Texnologiya Universiteti hava hücumlarına məruz qalıb

umman55 — Sun, 29 Mar 2026 19:30:03 +0200

İranın İsfahan Texnologiya Universiteti ABŞ və İsrailin hava hücumlarına məruz qalıb.

Bu barədə İranın “Fars” agentliyi məlumat yayıb.

Məlumata görə, hücum nəticəsində universitetin bir neçə binasına ziyan dəyib və azı dörd işçi yaralanıb.