İdman

Beynəlxalq İdman Araşdırmaları Mərkəzi (CIES) Avropada cari mövsüm və son beş ildə həyata keçirilən futbolçu transferlərinin maliyyə nəticələrini açıqlayıb.

 2025/2026-cı illər mövsümünə aid iki transfer pəncərəsi üzrə ən böyük mənfi balans İngiltərə Premyer Liqasının hazırkı lideri “Arsenal”da qeydə alınıb (-362 milyon avro). London klubu yeni oyunçuların alışına 378 milyon avro xərcləyib, əvəzində isə cəmi 16 milyon avro gəlir əldə edib. Siyahıda ikinci ən mənfi göstərici “Liverpul”a məxsusdur (-244 milyon avro).

Son beş ildə isə transferlərə ən çox vəsait xərcləyən klublar “Çelsi” (-883 milyon avro) və “Mançester Yunayted” (-859 milyon avro) olub.

Ən müsbət transfer balansına malik komandalar isə cari mövsümdə “Monako” (+148 milyon avro), son beş ildə isə “Benfika” (+346 milyon avro) olub. Portuqaliya təmsilçisi bu göstəricidə “Lill” (+273 milyon avro), “Ayaks” (+270 milyon avro) və “Zalsburq”u (+242 milyon avro) qabaqlayıb.

Qeyd olunub ki, araşdırmada göstərilən bütün rəqəmlərə əlavə ödənişlər və sonrakı satışlardan əldə olunan gəlirlər də daxil edilib.