İdman - UMMANPRESS

Messi İspaniyanın “Kornelya” futbol klubunun sahibi olub

umman55 — Fri, 17 Apr 2026 21:22:20 +0200

Argentina millisinin və ABŞ-nin “İnter Mayami” klubunun hücumçusu Lionel Messi İspaniyanın üçüncü divizionunda çıxış edən “Kornelya” futbol klubunu satın alıb.

Bu barədə jurnalist Fabritsio Romano məlumat yayıb.

Qeyd edək ki, daha əvvəl portuqaliyalı hücumçu Kriştianu Ronaldunun İspaniya çempionatının ikinci divizionunda çıxış edən “Almeriya” futbol klubunun səhmlərinin 25 faizinin sahibi olduğu barədə xəbər yayılmışdı.

Xatırladaq ki, Messinin 38 yaşı var və o, səkkiz dəfə “Qızıl top” mükafatına layiq görülüb. Argentinalı futbolçu Avropada Fransanın “Pari Sen-Jermen” və İspaniyanın “Barselona” klublarında çıxış edib. O, “Barselona”nın heyətində dörd dəfə UEFA Çempionlar Liqasının qalibi olub, üç dəfə UEFA Superkubokunu və klublararası dünya çempionatını qazanıb. Hücumçu 2022-ci ildə dünya çempionu olub, 2014-cü ildə dünya çempionatının gümüş mükafatını qazanıb, 2008-ci ildə Olimpiya çempionu olub və iki dəfə Amerika Kubokunun (2021, 2024) qalibi adını əldə edib.

Azərbaycanın 7 cüdoçusu Avropa çempionatında mübarizəyə başlayır

umman55 — Thu, 16 Apr 2026 09:50:01 +0200

Bu gün Gürcüstanın paytaxtı Tbilisidə cüdo üzrə böyüklər arasında Avropa çempionatı start götürəcək.

İlk yarış günündə Azərbaycanın dörd çəki dərəcəsində 7 cüdoçusu tatamiyə çıxacaq.

Kişilər

60 kiloqram, 1/8 final

Balabəy Ağayev – Qal Blaziç (Sloveniya) /Andrea Karlino (İtaliya) cütünün qalibi ilə

Əhməd Yusifov – Çarli Eyr (Böyük Britaniya) / Marton Andrasi (Macarıstan) cütünün qalibi ilə

66 kiloqram, 1/16 final

Turan Bayramov – Nikolas Kuntse (Almaniya)

Qadınlar

48 kiloqram, 1/16 final

Könül Əliyeva – Amber Gersyes (Niderland)

Şəfəq Həmidova – Erza Muminoviç (Kosovo)

52 kiloqram, 1/16 final

Leyla Əliyeva – Nikolina Nişaviç (Serbiya)

Gültac Məmmədəliyeva – Karla Tavares Fernandeş (Lüksemburq)

Təsnifat mərhələsi Bakı vaxtı ilə saat 10:00-da, final isə 16:00-da başlayacaq.

Qeyd edək ki, aprelin 19-dək davam edəcək mötəbər turnirdə 46 ölkədən 400 idmançı qüvvəsini sınayacaq.

Güləş üzrə Azərbaycan yığmalarının Avropa çempionatı üçün heyəti açıqlanıb

umman55 — Tue, 14 Apr 2026 17:31:24 +0200

Aprelin 20-dən 26-dək Albaniyanın Tirana şəhərində güləş üzrə Avropa çempionatı keçiriləcək.

Bu gün Azərbaycan Güləş Federasiyasının (AGF) təlim-məşq bazasında məsul yarışda iştirak edəcək milli komandalarla görüş keçirilib. AGF-nin baş katibi Pərvin Piriyev, vitse-prezidentlər Namiq Abdullayev və Fərid Mansurov, eləcə də sərbəst güləş üzrə koordinator Hacı Əliyev çıxış edərək millinin hər bir üzvünə inandıqlarını, görüşün nəticəsindən asılı olmayaraq son nəfəsədək mübarizə aparmağın vacibliyini dilə gətiriblər.

Daha sonra qitə birinciliyində iştirak edəcək heyət açıqlanıb. Yunan-Roma güləşi üzrə yığma yarışın ilk günlərində mübarizə aparacaq. Baş məşqçi Məhəmməd Bəna, böyük məşqçi Nurəddin Rəcəbov, məşqçilər Rövşən Bayramov, Bəhruz Həzrətipur, Rəsul Cəzini və Sabah Şəriətinin rəhbərliyi altında Rəşad Məmmədov (55 kiloqram), Nihat Məmmədli (60 kiloqram), Ziya Babaşov (63 kiloqram), Həsrət Cəfərov (67 kiloqram), Ruslan Nurullayev (72 kiloqram), Sənan Süleymanov (77 kiloqram), Qurban Qurbanov (82 kiloqram), İslam Abbasov (87 kiloqram), Murad Əhmədiyev (97 kiloqram) və Beka Kandelaki (130 kiloqram) çıxış edəcəklər.

Daha sonra qadın güləşi baş tutacaq. Baş məşqçi əvəzi Toğrul Əsgərov və böyük məşqçi Ağahüseyn Mustafayevin rəhbərliyi altında Elnurə Məmmədova (50 kiloqram), Jalə Əliyeva (57 kiloqram), Günay Qurbanova (59 kiloqram), Ruzanna Məmmədova (62 kiloqram) və Birgül Soltanova (65 kiloqram) ölkəmizi təmsil edəcəklər.

Yarışın son günlərində isə sərbəst güləş üzrə mübarizə reallaşacaq. Baş məşqçi Xetaq Qazyumov, böyük məşqçi Cəbrayıl Həsənov, məşqçilər Taymuraz Kokoyevlə Şərif Şərifovun rəhbərliyi altında İslam Bazarqanov (57 kiloqram), Nürəddin Novruzov (61 kiloqram), Rəşid Babazadə (65 kiloqram), Kənan Heybətov (70 kiloqram), Turan Bayramov (74 kiloqram), Cəbrayıl Hacıyev (79 kiloqram), Arseni Cioyev (86 kiloqram), Ali Tsokoyev (92 kiloqram), Osman Nurmaqomedov (97 kiloqram) və Giorgi Meşvildişvili (125 kiloqram) uğur qazanmağa çalışacaqlar.

Avropa çempionatında ədaləti I-S dərəcəli hakimlərimiz – Asif Şirəliyev, Sədi Quliyev və Bəşir İsazadə qoruyacaq.

Azərbayan gimnastları Avropa çempionatında tarix yazıblar

umman55 — Mon, 13 Apr 2026 12:14:26 +0200

Portuqaliyanın Portimao şəhərində keçirilən batut gimnastikası və tamblinq üzrə Avropa çempionatı Azərbaycan gimnastikası üçün əlamətdar nəticələrlə yekunlaşıb.

Azərbaycan Gimnastika Federasiyasından verilən məlumata görə, ölkəmiz bu mötəbər yarışda gənclər və böyüklər yaş kateqoriyalarında ümumilikdə 23 gimnastla təmsil olunub.

Təsnifat mərhələlərindən uğurla keçən gimnastlarımız bir sıra kateqoriyalar üzrə yarımfinal və final mərhələlərində mübarizə aparıblar. Batut gimnastikası üzrə fərdi proqramda Selcan Mahsudova çempionatı 56.550 xalla 4-cü, Maqsud Mahsudov isə 60.080 xalla 6-cı pillədə tamamlayıb.

Komanda yarışlarında həm gənclər, həm də böyüklərdən ibarət heyətlərimiz final mərhələsinə vəsiqə qazanaraq tarixi nailiyyətə imza atıblar. Böyüklərdən ibarət komanda finalda 4-cü yeri tutaraq yüksək nəticə göstərib.

Sinxron proqramlarda da gimnastlarımız uğurla çıxış edərək növbəti mərhələlərə yüksəlib, ölkəmizi layiqincə təmsil ediblər.

İkili-mini batut üzrə gənclərdən ibarət komandamız finala yüksələrək Azərbaycan gimnastikası tarixində yeni səhifə açıb. Eyni zamanda Ammar Baxşalıyev fərdi proqramda finalda mübarizə aparıb.

Tamblinq üzrə çıxışlar xüsusilə yaddaqalan olub. Komandamız final mərhələsində yüksək nəticə göstərərək gümüş medal qazanıb. Fərdi proqramda isə Tofiq Əliyev 29.300 xalla Avropa çempionatının gümüş medalına layiq görülüb. Bu nəticə onun Avropa çempionatlarında ardıcıl olaraq qazandığı ikinci gümüş medaldır.

Bu Avropa çempionatı Azərbaycan gimnastikası tarixində ilk dəfə olaraq həm gənclər, həm də böyüklər yaş kateqoriyalarında batut gimnastikası üzrə komanda hesabında, eləcə də ikili-mini batut üzrə gənclər arasında final mərhələlərinə yüksəlməklə yadda qalıb.

Azərbaycan gimnastları Avropa çempionatında ümumilikdə mümkün olan 16 final mərhələsindən 13-nə yüksələrək yarışın ən uğurlu iştirakçıları sırasında yer alıblar.

“Barselona” hakimliklə bağlı UEFA-ya şikayət edib

umman55 — Fri, 10 Apr 2026 13:13:01 +0200

İspaniyanın “Barselona” klubu Çempionlar Liqasının 1/4 final mərhələsində “Atletiko” ilə keçirilmiş ilk oyundakı (0:2) hakim qərarlarından UEFA-ya rəsmi şikayət ünvanlayıb.

Kataloniya təmsilçisi ikinci hissədə rəqib müdafiəçi Mark Pubilin topa əllə toxunduğunu iddia edərək, penalti təyin olunmamasını əsas narazılıq səbəbi kimi göstərib. Bildirilir ki, qapıçı Xuan Mussodan ötürmə zamanı top cərimə meydançasında Pubilin əlinə dəyib.

Klub hesab edir ki, bu qərar qaydalara ziddir və oyunun gedişinə birbaşa təsir göstərib. Bu səbəbdən “Barselona” məsələ ilə bağlı araşdırma aparılmasını, hakimlərin səs yazılarının açıqlanmasını və zərurət yaranacağı halda səhvin rəsmi şəkildə tanınmasını tələb edib.

Açıqlamada son illərdə Çempionlar Liqasında oxşar hakim qərarlarının komandanın çıxışına mənfi təsir göstərdiyi də vurğulanıb.

Qeyd edək ki, komandalar arasında cavab oyunu aprelin 14-də Madriddə keçiriləcək.

Misli Premyer Liqasında XXVI tura yekun vurulub

umman55 — Tue, 07 Apr 2026 20:46:16 +0200

Futbol üzrə Misli Premyer Liqasında XXVI tura yekun vurulub.

Son oyun günündə "Araz-Naxçıvan" "Sabah"ı qəbul edib. "Liv Bona Dea Arena"da keçirilən matç Bakı klubunun 4:2 hesablı qələbəsi ilə bitib.

Bu nəticədən sonra “Sabah" turnir cədvəlindəki xallarını 65-ə çatdıraraq liderliyini möhkəmlədib. “Araz-Naxçıvan" isə 39 xalla altıncı pillədədir.

Qeyd edək ki, turun əvvəlki oyunlarında "Qəbələ" "Kəpəz"ə 2:0, "Neftçi" "Sumqayıt"a 3:1, "Qarabağ" "Karvan-Yevlax" 7:0 hesabı ilə qalib gəlib. “İmişli” – “Turan Tovuz”, “Zirə” - “Şamaxı” oyunlarında isə heç-heçə qeydə alınıb – 1:1.

Güc idman növləri üzrə Azərbaycan çempionları müəyyənləşib

umman55 — Wed, 01 Apr 2026 10:31:39 +0200

Bakıda müxtəlif güc idman növlərini əhatə edən Azərbaycan çempionatı keçirilib.

İdmançılar turnirdə stronqmen, strikt karl və stritliftinq növləri üzrə qüvvələrini sınayıblar.

Stronqmen kateqoriyasında Gəncəni təmsil edən Əli Əliyev 161 kiloqram nəticə göstərərək yeni Azərbaycan rekordu müəyyənləşdirib.

Deddlift hərəkətində də yüksək nəticələr qeydə alınıb. Kamran Lazımov (95 kiloqram) 350 kiloqram ağırlığı qaldırıb və ölkə rekordunu yeniləyib.

Eyni zamanda, Vadim Zelenov (70 kiloqram) loq lift hərəkətində 110 kiloqram nəticə göstərərək yeni Azərbaycan rekorduna imza atıb.

Yarışın yekunlarına əsasən, müxtəlif çəki dərəcələrində qaliblər də müəyyənləşib. Kamal Məmmədli 75 kiloqram çəki dərəcəsində çempion olmaqla yanaşı, mütləq çempion adına layiq görülüb. Digər çəki dərəcələrində isə Cəlil Əliyev (110 kiloqram), Nicat Hüseynov (100 kiloqram), Sultan Sultanov (90 kiloqram), Sadiq Musayev (82 kiloqram), Vadim Zelenov (67,5 kiloqram), Bora Güner (140 kiloqram) və Surət Pirnəzərov (125 kiloqram) birinci yeri tutublar.

UEFA Avropa Liqasında 1/8 final mərhələsinə yekun vurulub

umman55 — Fri, 20 Mar 2026 09:42:33 +0100

UEFA Avropa Liqasında bu gün 1/4 finala yüksələn bütün komandalar müəyyənləşib.

1/8 final mərhələsində 7 qarşılaşma baş tutub.

UEFA Avropa Liqası

1/8 final, cavab görüşləri

19 mart

21:45. "Frayburq" (Almaniya) – "Genk" (Belçika) – 5:1

İlk oyun – 0:1

21:45. "Lion" (Fransa) – "Selta" (İspaniya)

İlk oyun – 1:1

21:45. "Midtyullann" (Danimarka) – "Nottinqem Forest" (İngiltərə) – 1:2

İlk oyun – 1:0

00:00. "Betis" (İspaniya) – "Panatinaikos" (Yunanıstan) – 4:0

İlk oyun – 0:1

00:00. "Portu" (Portuqaliya) – "Ştutqart" (Almaniya) - 2:0

İlk oyun – 2:1

00:00. "Roma" (İtaliya) – "Bolonya" (İtaliya) – 4:3

İlk oyun – 1:1

00:00. "Aston Villa" (İngiltərə) – "Lill" (Fransa) – 2:0

İlk oyun – 1:0

Xatırladaq ki, martın 18-də gün baş tutan matçda Portuqaliyanın "Braqa" klubu Macarıstan təmsilçisi "Ferentsvaroş"u iki oyunun nəticəsinə (0:2, 4:0) üstələyərək 1/4 finala yüksəlib.

"Bavariya"nın hücumçusu 2 oyunluq cəzalandırıldı

umman55 — Tue, 17 Mar 2026 09:39:46 +0100

Nikolas Cekson iki oyunluq diskvalifikasiya alıb.

"Bavariya"Nın hücumçusu Bundesliqanın 26-cı turunda "Bayer"lə oyunda (1:1) qırmızı vərəqə görüb. O, 41-ci dəqiqədə Martin Terrierin topuğuna zərbə endirib.

"German Football Association"in nəzarət komitəsi kobud oyuna görə seneqallı futbolçunun iki matçlıq cəzalandırılması barədə qərar verib.

Beləliklə, Cekson Bundesliqada "Union"(Berlin) və "Frayburq" ilə oyunları buraxacaq.

Azərbaycanı Macarıstandakı turnirdə 9 boksçu təmsil edəcək

umman55 — Mon, 16 Mar 2026 17:49:51 +0100

Martın 17-də Macarıstanın Debretsen şəhərində kişi və qadın boksçular arasında beynəlxalq turnir start götürəcək.

Boks Federasiyasından bildirilib ki, 5 gün davam edəcək yarışda Azərbaycan millisi də qüvvəsini sınayacaq.

Yığmanın heyətində rinqə Amin Məmmədzadə (55 kiloqram), Nəbi İsgəndərov, Nicat Alırzayev (hər ikisi 70 kiloqram), Abbasqulu Şadlinski (75 kiloqram), Həsən Osmanlı (80 kiloqram), Ramal Həsənli, Rauf Rəhimov (hər ikisi 85 kiloqram), Zeynəb Rəhimova (54 kiloqram) və Emili Rzayeva (60 kiloqram) çıxacaqlar.

Turnirdə ölkəmizi Anar Nağdıyev hakim kimi təmsil edəcək.