Yazarlar

Agah Xaçmazlı

İÇİMİN ATƏŞİ

Qəlbimə qar yağdırır yarın soyuq buludu,
Ya Rəbb, söndür içimdə bu atəşi, bu odu.

Səsim çıxmır içimdə mızıldandım mən bir az,
Zahirim dəf, nağara, dəyir başıma qapaz.
Dodağıma gülüş yaz, bəxtimə toy-düyün yaz,
İnlətmə ney-kamanı, titrətmə tarı, udu.
Ya Rəbb, söndür içimdə bu atəşi, bu odu.

Məni azad yaratdın, ağlımla yol seçmişəm,
Könlümə eşq şərabı düşüb, mən də, içmişəm.
Saysız bəlalar görüb, imtahanlar keçmişəm ,
Bu dünyada çəkmişəm axirətdəki sudu.
Ya Rəbb, söndür içimdə bu atəşi, bu odu.

Çölümdə düşman olan sevir məni içimdən,
Bəxtimi soyundurub geyir məni içimdən,
Girib mənim qəlbimə yeyir məni içimdən,
Ayı hoqqadan çıxır yemək üçün armudu.
Ya Rəbb, söndür içimdə bu atəşi, bu odu.

Gəmi quruda olmaz, gəmi suda olandır,
Gəmiyə od düşəndə elə suda yanandır.
Agah da, bir gəmidir, su söndürmür, yalandır.
Artıq yorulmuşam mən, bitsin bu dedi-qodu,
Ya Rəbb, söndür içimdə bu atəşi bu odu.

Qəlbimə qar yağdırır yarın soyuq buludu,
Ya Rəbb, söndür içimdə bu atəşi, bu odu.