Dünya

Pakistanın şimal-qərbində kamikadze terrorçu məscidin qarşısında özünü partladıb. Nəticədə 1 mülki sakin ölüb, 7 polis əməkdaşı yaralanıb.

İlkin məlumatlara görə, terrorçu məscidə girməyə cəhd edib, lakin içəri daxil ola bilməyib və binanın qarşısında üzərindəki partlayıcı qurğunu işə salıb.

Məlumatda qeyd olunur ki, Pakistanın şimal-qərbindəki Xayber Paxtunxva əyalətində cümə namazı zamanı məscidin yaxınlığında törədilən terror aktı nəticəsində azı bir mülki şəxs ölüb, yeddi polis əməkdaşı yaralanıb.

Partlayış Lakki Marvat rayonunun Xayro Xel ərazisində, ibadət edənlərin cümə namazı üçün camaatla toplaşdığı yerdə baş verib.

Yaralılar yaxınlıqdakı xəstəxanaya aparılıb.

Polislər ərazini mühasirəyə alıb və hadisə ilə bağlı araşdırma başlanılıb. Terror aktına görə heç bir qruplaşma məsuliyyəti öz üzərinə götürməyib.

Bildirilir ki, Pakistanda, xüsusən də Xayber Paxtunxva və cənub-qərbi Bəlucistan əyalətlərində terror aktlarının sayı yenidən artıb və bu, hakimiyyət orqanlarının davamlı təhlükəsizlik əməliyyatları həyata keçirməsinə səbəb olub.